မြန်မာ့ရိုးရာယဉ်ကျေးမှု အမွေအနှစ်များ ထိန်းသိမ်းမြှင့်တင်ရေး လူငယ်များနှင့် အနုပညာရှင်များ ပူးပေါင်းဆောင်ရွက်ရန် နိုင်ငံတော်သမ္မတ တိုက်တွန်း
အောက်တိုဘာလ ၃၀ ရက်၊ ၂၀၂၆
(၂၇) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ ဂုဏ်ပြုမှတ်တမ်းလွှာပေးအပ်ပွဲနှင့် ဂုဏ်ပြုညစာစားပွဲကို နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန-၁ (MICC-1) ၌ ကျင်းပပြုလုပ်ခဲ့ရာ နိုင်ငံတော်သမ္မတ တက်ရောက်အားပေးခဲ့ကြောင်း သိရပါတယ်။
အခမ်းအနားတွင် နိုင်ငံတော်သမ္မတက ၂၁ ရာစု နည်းပညာနှင့် ဆက်သွယ်ရေး တိုးတက်မှုများကြောင့် ယဉ်ကျေးမှုလွှမ်းမိုးမှုများ နယ်စည်းမခြား ပျံ့နှံ့လာသဖြင့် လူငယ်များအနေဖြင့် ခေတ်မီတိုးတက်မှုများကို လိုက်ပါဆောင်ရွက်ရာတွင် မိမိတို့၏ ရိုးရာယဉ်ကျေးမှုတန်ဖိုးများကို ထိန်းသိမ်းစောင့်ရှောက်ကြရန်လိုကြောင်း မှာကြားခဲ့ပါတယ်။
ထို့ပြင် မြန်မာ့ရိုးရာယဉ်ကျေးမှု အမွေအနှစ်များ ရှင်သန်ဖွံ့ဖြိုးလာစေရေးအတွက် လူငယ်များ၊ အနုပညာရှင်များနှင့် တာဝန်ရှိသူအားလုံးက မိမိတို့၏ အနုပညာစွမ်းရည်နှင့် တာဝန်ယူမှုတို့ဖြင့် ဝိုင်းဝန်းကြိုးပမ်းဆောင်ရွက်ကြရန် တိုက်တွန်းမှာကြားခဲ့ကြောင်း သိရပါတယ်။
