မြန်မာနိုင်ငံနှင့် အိန္ဒိယနိုင်ငံတို့အကြား နားလည်မှုစာချွန်လွှာ (MoU) ၅ စောင် လက်မှတ်ရေးထိုး
အောက်တိုဘာလ ၁၆ ရက်၊ ၂၀၂၆
မြန်မာနိုင်ငံနှင့် အိန္ဒိယနိုင်ငံတို့အကြား ၂၀၂၆-၂၀၂၇ ဘဏ္ဍာနှစ်အတွက် “မြန်ဆန်စွာ အကျိုးဖြစ်ထွန်းစေမည့် စီမံချက်များ (Quick Impact Projects- QIP)” အကောင်အထည်ဖော် ဆောင်ရွက်ရန် နားလည်မှုစာချွန်လွှာ ၅ စောင် လက်မှတ်ရေးထိုးခြင်း အခမ်းအနားကို အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဝန်ကြီးဌာန၌ ကျင်းပခဲ့ကြောင်း သိရပါတယ်။
လက်မှတ်ရေးထိုးခဲ့သည့် စီမံချက်များတွင် ရန်ကုန်မြို့ ပြည်ထောင်စုတိုင်းရင်းသားကျေးရွာရှိ ကျေးရွာပတ်လမ်း အဆင့်မြှင့်တင်ခြင်း၊ ငလျင်ဒဏ်သင့် ကျောင်းများအတွက် WASH ထောက်ပံ့ကူညီရေး၊ ဘွိင်လာကိုင်တွယ်ထိန်းသိမ်းသူများ သင်တန်းကျောင်း အဆင့်မြှင့်တင်ခြင်း၊ မန္တလေး ပုသိမ်ကြီးလူငယ်သင်တန်းကျောင်း၌ ဖူဆယ်ဘောလုံးကွင်း တည်ဆောက်ခြင်းနှင့် စာရင်းစစ်ဆေးလေ့ကျင့်ရေးအတွက် အချက်အလက် ထုတ်ယူစိစစ်သုံးသပ်သော ဆော့ဖ်ဝဲလ် ဝယ်ယူခြင်းတို့ ပါဝင်ပြီး သက်ဆိုင်ရာ ကဏ္ဍအလိုက် အသီးသီး လက်မှတ်ရေးထိုးခဲ့ကြကြောင်း သိရပါတယ်။
