SpaceX ကုမ္ပဏီက ဧရာမ Starship အာကာသယာဉ်ကို ကမ္ဘာပတ်လမ်းကြောင်းအတွင်းသို့ အောင်မြင်စွာ လွှတ်တင်
စက်တင်ဘာလ ၂၉ ရက်၊ ၂၀၂၆
အမေရိကန်ပြည်ထောင်စုအခြေစိုက် SpaceX အာကာသနည်းပညာကုမ္ပဏီကြီးသည် ၎င်းတည်ဆောက်ခဲ့သမျှတွင် အကြီးမားဆုံးနှင့် စွမ်းအားအကြီးဆုံးဖြစ်သော ၄၀၇ ပေ (၁၂၄ မီတာ) အလျားရှိ Starship အာကာသယာဉ်ကို တက္ကဆက်ပြည်နယ်ရှိ Starbase မှတစ်ဆင့် ကမ္ဘာပတ်လမ်းကြောင်းအတွင်းသို့ စက်တင်ဘာလ ၂၈ ရက်က အောင်မြင်စွာ လွှတ်တင်ခဲ့ကြောင်း သိရပါတယ်။
အဆိုပါ လွှတ်တင်မှုအတွင်း အဆင့်မြင့် Starlink V3 ဂြိုဟ်တု ၂၆ လုံးကိုလည်း အာကာသအတွင်းသို့ တင်ဆောင်သွားခဲ့ပြီး ပတ်လမ်းကြောင်းအတွင်း အောင်မြင်စွာ ဖြန့်ကျက်နိုင်ခဲ့ကြောင်း ကုမ္ပဏီ၏ အမှုဆောင်အရာရှိချုပ် အီလွန်မာ့က်စ်က အတည်ပြုပြောကြားခဲ့ပါတယ်။
မူလက ၁၀ နာရီကြာ ကမ္ဘာကို ခြောက်ကြိမ်ပတ်ရန် စီစဉ်ထားသော်လည်း လွှတ်တင်ပြီး တစ်နာရီအကြာတွင် ကမ္ဘာပတ်လမ်းကြောင်း၌ သုံးနာရီခန့်သာ ထားရှိတော့မည်ဟု SpaceX က ပြင်ဆင်သတ်မှတ်ခဲ့ပြီး ချီလီနိုင်ငံအနီး ပစိဖိတ်သမုဒ္ဒရာအတွင်းသို့ ဆင်းသက်ရန် စီစဉ်ထားပါတယ်။
NASA အကြီးအကဲ ဂျားအီဆာအက်မန်ကလည်း NASA ၏ Artemis လကမ္ဘာသွား အစီအစဉ်အတွက် အထောက်အပံ့ပေးနိုင်မည့် ယခုအောင်မြင်မှုကို ဘေးကင်းလုံခြုံစွာ ဆောင်ရွက်နိုင်ခဲ့သည့်အတွက် ချီးကျူးစကား ပြောကြားခဲ့ပါတယ်။
SpaceX သည် ၂၀၂၃ ခုနှစ်မှစ၍ စမ်းသပ်မှုများ ပြုလုပ်ခဲ့ပြီး လနှင့် အင်္ဂါဂြိုဟ် ခရီးစဉ်များ၊ စီးပွားဖြစ် ပျံသန်းမှုများအတွက် နည်းပညာပိုင်းဆိုင်ရာ စိန်ခေါ်မှုများကို ဆက်လက် ကျော်ဖြတ်ရန် ကြိုးပမ်းလျက်ရှိကြောင်း သတင်းရရှိပါတယ်။
