စံချိန်တင် အားအကောင်းဆုံး အယ်လ်နီညို ဖြစ်လာနိုင်သဖြင့် ကယ်လီဖိုးနီးယားတွင် အရေးပေါ်အခြေအနေ ကြေညာ
စက်တင်ဘာလ ၂၃ ရက်၊ ၂၀၂၆
အလွန်အားကောင်းသည့် အယ်လ်နီညို ရာသီဥတုဖြစ်စဉ် ကြုံတွေ့ရနိုင်သဖြင့် ကယ်လီဖိုးနီးယား ပြည်နယ်အုပ်ချုပ်ရေးမှူး Gavin Newsom က ပြည်နယ်တစ်ခုလုံး အရေးပေါ်အခြေအနေတစ်ရပ်ကို စက်တင်ဘာလ ၂၁ ရက်တွင် ထုတ်ပြန် ကြေညာခဲ့ပါတယ်။
အဆိုပါ ကြေညာချက်ကြောင့် ရေဘေးကာကွယ်ရေးနှင့် ကူညီကယ်ဆယ်ရေး လုပ်ငန်းများကို စာရွက်စာတမ်း အဆင့်ဆင့် မကြာဘဲ မြန်မြန်ဆန်ဆန် လုပ်ဆောင်နိုင်မည်ဖြစ်ပြီး အမျိုးသားအစောင့်တပ်ဖွဲ့ (National Guard) နှင့် ရှာဖွေကယ်ဆယ်ရေး စက်ယန္တရားများကိုပါ ကြိုတင်ပြင်ဆင်ထားနိုင်မည် ဖြစ်ပါတယ်။ အမျိုးသား သမုဒ္ဒရာနှင့် လေထု ကြီးကြပ်ကွပ်ကဲရေး အဖွဲ့ (NOAA) ၏ ခန့်မှန်းချက်အရ ယခုလာမည့် ဆောင်းဦးနှင့် ဆောင်းရာသီတွင် အားကောင်းသည့် အယ်လ်နီညို ဖြစ်ပေါ်ရန် ၉၀ ရာခိုင်နှုန်းကျော် သေချာနေကြောင်း သိရပါတယ်။
ပစိဖိတ်သမုဒ္ဒရာ အရှေ့ပိုင်း ရေအပူချိန်သည် ပျမ်းမျှထက် ၃ ဒီဂရီစင်တီဂရိတ် မြင့်တက်နေသဖြင့် ၁၉၅၀ ပြည့်နှစ်နောက်ပိုင်း သမိုင်းတစ်လျှောက် စံချိန်များကို ကျော်လွန်သွားရန် ၇၅ ရာခိုင်နှုန်းအထိ အခွင့်အလမ်း ရှိနေပါတယ်။ အဆိုပါ ဖြစ်စဉ်ကြောင့် အမေရိကန် တောင်ပိုင်းတွင် မိုးသည်းထန်စွာ ရွာသွန်းနိုင်သဖြင့် ကမ်းရိုးတန်းနှင့် နိမ့်ပါးသည့် ဒေသများတွင် ရေကြီးခြင်း၊ မြေပြိုခြင်းနှင့် ကမ်းပါးပြိုခြင်း အန္တရာယ်များကို ကာကွယ်နိုင်ရန် ဌာနဆိုင်ရာများက သဲအိတ်များ ချကင်းခြင်းအပါအဝင် ကြိုတင်ပြင်ဆင်မှုများ ဆောင်ရွက်လျက်ရှိကြောင်း သတင်းရရှိပါတယ်။
