ယူကရိန်းသမ္မတ ဇယ်လန်စကီး၏ ကာကွယ်ရေးဝန်ကြီးကို ရာထူးမှဖယ်ရှားမှုအား ဆန္ဒပြမှုများ ဖြစ်ပွား

ဇူလိုင်လ ၁၇ ရက်၊ ၂၀၂၆

ယူကရိန်းနိုင်ငံမြို့တော်၊ ကိယက်ဗ်တွင် သမ္မတ ဗိုလိုဒီမာ ဇယ်လန်စကီး စတင်ခဲ့သည့် ကျယ်ပြန့်သော အစိုးရအဖွဲ့ ပြန်လည်ဖွဲ့စည်းမှု၏ တစ်စိတ်တစ်ပိုင်းအဖြစ် ကာကွယ်ရေးဝန်ကြီး မီခေးလို ဖီဒိုရော့ဗ်အား ရာထူးမှဖယ်ရှားခြင်းကို ဆန့်ကျင်သည့်အနေဖြင် ရှားရှားပါးပါး ဆန္ဒပြမှုများ ဖြစ်ပွားခဲ့ရာ ယူကရိန်းစစ်တပ် ပြန်လည်ထူထောင်မှု၌ သဘောထားကွဲလွဲမှုများကို ပြသသကဲ့သို့ ဖြစ်ခဲ့ကြောင်း သိရပါတယ်။

ကာကွယ်ရေးဝန်ကြီးအဖြစ် ခြောက်လတာ တိုတောင်းလှသည့် ရာထူးသက်တမ်းအတွင်း ယူကရိန်း၏ ဒရုန်းစစ်ပွဲဆင်နွှဲမှုကို မြှင့်တင်ပေးခဲ့သည်ဟု ချီးကျူးခံရသော ကာကွယ်ရေးဝန်ကြီး မီခေးလို ဖီဒိုရော့ဗ်အား အစားထိုးရန် လုပ်ဆောင်ချက်ကို ကိယက်ဗ်မြို့လယ်ရှိ Ivan Franko အမျိုးသားဇာတ်ရုံအနီးတွင် ဇူလိုင်လ ၁၆ ရက်က ရာပေါင်းများစွာသော ဆန္ဒပြသမားများက ဆန့်ကျင်ခဲ့ကြပါတယ်။

ဆန္ဒပြသူများသည် အယ်လ်ဗစ်၊ အိုဒီဆာနှင့် ဒီနီပရိုတို့ အပါအဝင် အခြားမြို့များစွာတွင်လည်း စုဝေးခဲ့ကြပြီး ကိယက်ဗ်တွင် ၎င်းတို့က “ရှက်စရာ!” ဟု ကြွေးကြော်ကာ “ရုရှားလူမျိုးများ အောင်ပွဲခံနေပြီ” ဟု ရေးထားသော ဆိုင်းဘုတ်များကို ကိုင်ဆောင်ထားကြပါတယ်။

X တွင် ရေးသားရာတွင် ဖီဒိုရော့ဗ်က “ကာကွယ်ရေးဝန်ကြီးအဖြစ် ယူကရိန်းပြည်သူများအတွက် တာဝန်ထမ်းဆောင်မှုပေးရခြင်းအတွက် အလွန်ဂုဏ်ယူဝမ်းမြောက်မိပါသည်” ဟု ပြောကြားခဲ့ပြီး ၎င်း၏ ရာထူးသက်တမ်းအတွင်း ဝန်ကြီးဌာန၏ အဓိကအောင်မြင်မှုများအဖြစ် ဖော်ပြခဲ့သည့်အရာများကို ဖော်ပြခဲ့ပါတယ်။ ၎င်းတို့တွင် “ရုရှားတပ်ဖွဲ့များအတွက် Starlink ဝင်ရောက်ခွင့်” ကို ပိတ်ခြင်းနှင့် ရုရှားနှင့် ဖြစ်ပွားနေသော စစ်ပွဲအတွင်း ယူကရိန်း၏ ပြည်တွင်းဒရုန်းထုတ်လုပ်မှုကို တိုးချဲ့ရန် အစီအစဉ်များ စတင်ခြင်းတို့ ပါဝင်ခဲ့ပါတယ်။

သတင်းထောက်များအား မှတ်ချက်ပေးရာတွင် ဖီဒိုရော့ဗ်က ၎င်းနှင့် အငြင်းပွားခဲ့သောကာကွယ်ရေးဦးစီးချုပ် အိုလက်ဆန် ဆာစကိရီး (Oleksandr Syrskyi) ကို ဝေဖန်ခဲ့ပြီး စစ်တပ်ကို အိုလက်ဆန် တာဝန်ယူပါက ရုရှားကို မည်သို့အနိုင်ယူမည်ကို မေးမြန်းခဲ့သည်။

စစ်ဦးစီးချုပ်၏ တာဝန်ဖြစ်သော ရုရှားကို မည်သို့ အနိုင်ယူရမည်ကို ရှာဖွေမည့်အစား နိုင်ငံကို မည်သို့ခွဲခြားရမည်ကို အိုလက်ဆန်က တွက်ချက်နေကြောင်း ဖီဒိုရော့ဗ်က ပြောကြားခဲ့သည်ဟု AFP သတင်းဌာနက ဖော်ပြခဲ့ပါတယ်။

ဖီဒိုရော့ဗ်က နှေးကွေးသော ဗျူရိုကရေစီနှင့် ပြောင်းလွယ်ပြင်လွယ်မရှိခြင်းကို ဝေဖန်ခဲ့ပြီး “ဤဖွဲ့စည်းပုံတွင် ကျွန်ုပ်ကိုယ်တိုင် စစ်ပွဲကို မည်သို့အနိုင်ရရမည်ကို မသိပါ” ဟု ပြောကြားခဲ့ပါတယ်။

အိုလက်ဆန်က လပေါင်းများစွာ ပဋိပက္ခများ ဖြစ်ပွားပြီးနောက် ဇယ်လန်စကီး ထုတ်ပြန်ခဲ့သော နောက်ဆုံးအမိန့်ဖြင့် ၎င်းအား ရာထူးမှ ဖယ်ရှားရန် စီစဉ်ခဲ့သည်ဟုလည်း ဖီဒိုရော့ဗ်က စွပ်စွဲခဲ့ပါတယ်။

အသက် ၃၅ နှစ်အရွယ် နည်းပညာကျွမ်းကျင်သူ ဖီဒိုရော့ဗ်သည် ယခင်က ယူကရိန်း၏ ဒစ်ဂျစ်တယ်အသွင်ပြောင်းမှုအတွက် ပထမဆုံးဝန်ကြီးဖြစ်ခဲ့ပါတယ်။ ၂၀၂၆ နှစ်၊ ဇန်နဝါရီလတွင် ကာကွယ်ရေးဝန်ကြီး တာဝန်ပေးခြင်းခံခဲ့ရပါတယ်။

ဇယ်လန်စကီးက ဇူလိုင်လ ၁၆ ရက်တွင် စစ်တပ်အတွင်း စည်းလုံးညီညွတ်ရေးအတွက် တောင်းဆိုချက်တစ်ရပ် ထုတ်ပြန်ခဲ့ပါတယ်။ ထို့နောက် ယူကရိန်း၏ SBU လုံခြုံရေးဝန်ဆောင်မှု အကြီးအကဲ ယိဗ်ဂျီနီး ခမာရာကို ယာယီကာကွယ်ရေးဝန်ကြီးအဖြစ် ခန့်အပ်ခဲ့ပါတယ်။