နစက၏ ဝါဆိုသင်္ကန်းဆက်ကပ်လှူဒါန်းပွဲအား အဂ္ဂါဓိပတိသာသနာ့ဗိမာန်တော်ကြီး၌ကျင်းပ
နိုင်ငံတော်စီမံအုပ်ချုပ်ရေးကောင်စီ၏ ၂ဝ၂၅ ခုနှစ် ဝါဆိုသင်္ကန်းဆက်ကပ်လှူဒါန်းပွဲနှင့် မာရဝိဇယဗုဒ္ဓရုပ်ပွားတော်မြတ်ကြီး ဗုဒ္ဓဘိသေကအနေကဇာတင် အောင်ပွဲ(၂)နှစ်ပြည့်မင်္ဂလာအခမ်းအနားတို့အား ဇူလိုင် ၇ ရက်နံနက်ပိုင်းက မာရဝိဇယဗုဒ္ဓဥယျာဉ်တော်ပရိဝုဏ်အတွင်းရှိ အဂ္ဂါဓိပတိသာသနာ့ဗိမာန်တော်ကြီး၌ကျင်းပခဲ့သည်။
နိုင်ငံတော်သံဃမဟာနာယကအဖွဲ့ဥက္ကဋ္ဌ သန်လျင်မင်းကျောင်းဆရာတော်ကြီးနှင့် နိုင်ငံတော်သံဃမဟာနာယကအဖွဲ့အကျိုးတော်ဆောင်၊ မန္တလေးမြို့၊ မစိုးရိမ်တိုက်သစ် မဟာနာယက ဆရာတော်ကြီးတို့အမှူးပြု၍ ဥပ္ပါတသန္တိစေတီတော် ဂေါပကအဖွဲ့၏ ဩဝါဒါစရိယဆရာတော်ကြီးများအပါအဝင် ဆရာတော်ကြီး(၂၇)ပါးကြွရောက်ချီးမြှင့်တော်မူပြီး နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်နှင့် ဇနီးဒေါ်ကြူကြူလှတို့တက်ရောက်ကြည်ညိုပူဇော်ခဲ့ကြသည်။
သန်လျင်မင်းကျောင်းဆရာတော်ကြီးထံမှ တက်ရောက်လာကြသူများက ကိုးပါးသီလခံယူဆောက်တည်ပြီးနောက် ကြွရောက်တော်မူလာကြသည့် ဆရာတော်ကြီးများက မေတ္တသုတ် ပရိတ်တရားတော်များကို ရွတ်ပွားချီးမြှင့်တော်မူခဲ့ကြသည်။
ထို့နောက် ဆရာတော်ကြီးများထံ အလှူရှင်များက ဝါဆိုသင်္ကန်းနှင့် လှူဖွယ်ပစ္စည်းများကို ဆက်ကပ်လှူဒါန်းခဲ့ကြပြီးနောက် မစိုးရိမ်တိုက်သစ်ဆရာ တော်ကြီးထံမှ အနုမောဒနာတရားနာယူကြ၍ လှူဒါန်းမှုအစုစုအတွက် ရေစက်သွန်းချအမျှပေးဝေခဲ့ကြသည်။
