ထိုင်းနိုင်ငံ၊ လတ်ကရာဘန်ခရိုင်တွင် မြန်မာအလုပ်သမားများ၏ တိုက်ခိုက်မှုကြောင့် တရုတ်အလုပ်ရှင်တစ်ဦး သေဆုံးပြီး တစ်ဦးဒဏ်ရာရ
အောက်တိုဘာလ ၂၈ ရက်၊ ၂၀၂၆
ထိုင်းနိုင်ငံ၊ ဘန်ကောက်မြို့ လတ်ကရာဘန်ခရိုင်ရှိ ဆောက်လုပ်ရေးလုပ်သားများ နေထိုင်ရာစခန်းတစ်ခုတွင် အလုပ်မှထွက်ခွင့်တောင်းခံရာ၌ လုပ်ခလစာပေးချေရန် ငြင်းပယ်ခံရသဖြင့် တရုတ်လူမျိုး အလုပ်ရှင်နှစ်ဦးအား မြန်မာအလုပ်သမားလေးဦးက ဝင်ရောက်တိုက်ခိုက်ခဲ့ရာ တရုတ်အလုပ်ရှင်တစ်ဦး သေဆုံးကာ နောက်တစ်ဦးမှာ ပြင်းထန်စွာ ဒဏ်ရာရရှိခဲ့ကြောင်း သိရသည်။
အောက်တိုဘာလ ၂၇ ရက် ညပိုင်းက ဖြစ်ပွားခဲ့သော အဆိုပါဖြစ်စဉ်တွင် တရုတ်နိုင်ငံသား အလုပ်ရှင် ယန်ဇုံရှုး (အသက် ၃၉ နှစ်) မှာ သံချောင်းဖြင့် ရိုက်နှက်ခံရမှုကြောင့် အခင်းဖြစ်ပွားရာနေရာ၌ပင် သေဆုံးခဲ့ပြီး၊ အခြားအလုပ်ရှင်တစ်ဦးမှာလည်း ခေါင်းနှင့် ကျောဘက်တို့တွင် ဒဏ်ရာများရရှိခဲ့ကာ သီရိဒုံဆေးရုံသို့ ပို့ဆောင်ကုသလျက်ရှိသည်။ လုပ်ခလစာပေးချေရာတွင် ကြိုတင်အသိပေးရန် သဘောတူညီချက်ကို မလိုက်နာဟုဆိုကာ ငွေပေးချေရန် ငြင်းဆန်ခံရခြင်းကြောင့် စကားများရန်ဖြစ်ရာမှ ယခုကဲ့သို့ အကြမ်းဖက်တိုက်ခိုက်မှု ဖြစ်ပွားခဲ့ခြင်းဖြစ်ပြီး၊ တရားခံများမှာ လုပ်ခလစာ ဘတ် ၄၀,၀၀၀ မှ ၅၀,၀၀၀ ခန့်ကို ယူဆောင်ကာ ထွက်ပြေးသွားခဲ့ကြသဖြင့် ထိုင်းရဲတပ်ဖွဲ့က CCTV မှတ်တမ်းများအသုံးပြုကာ လိုက်လံရှာဖွေလျက်ရှိကြောင်း သိရသည်။
