တက္ကသိုလ်ဝင်ခွင့်များ လျှောက်ထားနိုင်ကြောင်း ကြေညာ
၂၀၂၄ ခုနှစ် တက္ကသိုလ်ဝင်တန်းစာမေးပွဲ အောင်မြင်သူများအနေဖြင့် တက္ကသိုလ်ဝင်ခွင့်များ လျှောက်ထားနိုင်ကြောင်း ပညာရေးဝန်ကြီးဌာနက ထုတ်ပြန်ထားသည်။ တက္ကသိုလ်ဝင်ခွင့်လျှောက်လွှာများကို ဩဂုတ်၂၆ ရက်မှ စက်တင်ဘာ ၁၂ ရက်အထိ ပိတ်ရက်မရှိ တက္ကသိုလ်၂၃ ခု၌ စတင်လျှောက်ထားနိုင်မည်ဖြစ်ပြီး လျှောက်ထားရန်အတွက် လိုအပ်ချက်များ ကိုလည်း ထုတ်ပြန်ထားသည်။
ထုတ်ပြန်ရာတွင် မိမိတို့ စာမေးပွဲ ဖြေဆိုခဲ့သည့် စာစစ်ဌာနကြီးကြပ်ရေးမှူး/ အခြေခံပညာအထက်တန်း ကျောင်းအုပ်ကြီးများ ထံမှ အမှတ်စာရင်း၊ အရည်အချင်းမှတ်တမ်းချုပ် ရမှတ်အဆင့်၊ တက္ကသိုလ်ဝင်ခွင့်လမ်းညွှန်စာအုပ်နှင့် တက္ကသိုလ်ဝင်ခွင့် လျှောက်ထားရမည့် ပုံစံစာအိတ်ကို ကိုယ်တိုင်ထုတ်ယူရမည် ဖြစ်သည်ဟု ဆိုသည်။
သတ်မှတ်ရက်ကျော်လွန်ကာ လျှောက်ထားသူများသည် ရန်ကုန်မြို့၊ သထုံလမ်းတွင် ရှိသည့် အဆင့်မြင့်ပညာဦးစီးဌာန (ရန်ကုန်ရုံးခွဲ)ကို ပေးပို့လျှောက်ထားရမည်ဖြစ်ကြောင်းလည်း ထုတ်ပြန်ချက်၌ ဖော်ပြထားသည်။
