မြန်မာအမျိုးသားလေကြောင်း ရန်ကုန်-နန်နင်း – ရန်ကုန် Cargo ခရီးစဉ် စတင်ပျံသန်းပြေးဆွဲ
မြန်မာအမျိုးသားလေကြောင်း၏ ရန်ကုန်-နန်နင်း – ရန်ကုန် ကုန်ပစ္စည်းသယ်ယူဆောင်ရေးလေကြောင်း ခရီးစဉ်များ(Cargo Flight) အား မေလ(၁၆)ရက်နေ့ မွန်းလွဲ (၁၂)နာရီ (၁၅)မိနစ်တွင် ရန်ကုန်အပြည်ပြည်ဆိုင်ရာ လေဆိပ်မှ Boeing 737-800 Freighter လေယာဉ်ဖြင့် စတင်ပျံသန်းပြေးဆွဲသည်။
ယနေ့ ရန်ကုန်-နန်နင်းခရီးစဉ်(UB-8503) ဖြင့် ရေထွက်ကုန်ပစ္စည်းများဖြစ်သော ကဏန်း နှင့်ငါးရှဉ့် (၁၆)တန် တင်ဆောင် ခဲ့ပြီး ရန်ကုန်-နန်နင်း – ရန်ကုန် ကုန်ပစ္စည်းသယ်ယူပို့ဆောင်ရေးလေကြောင်းခရီးစဉ် Cargo Flight အား တစ်ပတ်လျှင် သုံးကြိမ် အင်္ဂါ၊ ကြာသပတေးနှင့် စနေနေ့များတွင် ပျံသန်းပြေးဆွဲသွားမည်ဖြစ်သည်။
Boeing 737-800 Freighter လေယာဉ်သည် ၂၀၂၄ ခုနှစ်၊ ဇန်နဝါရီ (၂၄)ရက်တွင် မြန်မာနိုင်ငံသို့ ဆိုက်ရောက်ခဲ့ပြီး မြန်မာအမျိုးသားလေကြောင်း၏ ကုန်ပစ္စည်း သယ်ယူပို့ဆောင်ရေး လေကြောင်းခရီးစဉ်များဖြစ်သော ရန်ကုန်-ကူမင်း- ရန်ကုန်၊ ရန်ကုန်-ဘန်ကောက်-ရန်ကုန်၊ ရန်ကုန်-စင်ကာပူ- ရန်ကုန်နှင့် ရန်ကုန်-မန်စီ-ရန်ကုန် Cargo ခရီးစဉ်များတွင် ပျံသန်းပြေးဆွဲပေးလျက်ရှိသည်ဟု သိရသည်။
