ဘီးလင်း-နတ်ကြီးသွားကားလမ်းမပေါ်ရှိ တံတားတစ်စင်းကို လက်နက်ကိုင်အဖွဲ့ဝင်များက မိုင်းခွဲ ဖျက်စီး
မွန်ပြည်နယ်၊ ဘီးလင်းမြို့နယ်၊ ဘီးလင်း-နတ်ကြီးသွားကားလမ်းပေါ်ရှိ အရှည်ပေ(၈၀)ရှိသောတံတားတစ်စင်းကို လက်နက်ကိုင်အဖွဲ့ဝင်များမှ မေ ၂၆ ရက်နံနက်ပိုင်းက မိုင်းခွဲဖျက်စီးခဲ့ကြကြောင်း သိရသည်။
လက်နက်ကိုင်အဖွဲ့ဝင်များသည် ဘီးလင်းမြို့နယ်၊ တညင်ပင်ကျေးရွာ၏ အနောက်ဘက်မီတာ ၃၀၀ ခန့်အကွာ ဘီးလင်း-နတ်ကြီးသွားကားလမ်း၏ မိုင်တိုင်အမှတ် ၁၆/၂ နှင့် ၁၆/၃ ကြား အရှည်(၈၀) ပေ၊ အကျယ်(၂၄)ပေရှိ သံကူ ကွန်ကရစ်အမျိုးအစားဖြစ်သော တံတားအမှတ်(၃/၁၇)အား မိုင်းထောင်ဖောက်ခွဲဖျက်ဆီးခဲ့ကြကြောင်း သိရသည်။
မိုင်းပေါက်ကွဲမှုကြောင့် တံတား၏တောင်ဘက် ကမ်းကပ်ခုံမှာပြိုကျပျက်စီးခဲ့ပြီး လူနှင့် မော်တော်ယာဉ်များဖြတ်သန်းသွားလာ၍မရသဖြင့် တာဝန်ရှိသူများက ပြန်လည်ပြုပြင်များကို ဆောင်ရွက်လျက်ရှိကြောင်း သိရသည်။ ထို့ပြင် လုံခြုံရေးအဖွဲ့ဝင်များမှလည်း ပြစ်မှုကျူးလွန်သူများအား ထိရောက်စွာအရေးယူနိုင်ရေးနှင့် လုံခြုံရေးလုပ်ငန်းများကို ဆက်လက်ဆောင်ရွက်လျက်ရှိကြောင်း သိရသည်။
