အမေရိကန်သမ္မတ ဒေါ်နယ်ဒ် ထရမ့်ပ်၏ ဒီဇယ်ဆီ ပံ့ပိုးပေးရေး သဘောတူညီချက်ကြောင့် အမေရိကန်-ယူကရိန်း ဆက်ဆံရေး ပိုမို တင်းမာလာ

အောက်တိုဘာလ ၁၄ ရက်၊ ၂၀၂၆

အမေရိကန်ပြည်ထောင်စု သမ္မတ ဒေါ်နယ်ဒ် ထရမ့်ပ်နှင့် ရုရှား သမ္မတ ဗလာဒီမာ ပူတင်တို့အကြား ရုရှားက အမေရိကန်နှင့် ကမ္ဘာ့ဈေးကွက်သို့ ဒီဇယ်ဆီ ပံ့ပိုးပေးရေး သဘောတူညီချက် ရရှိခဲ့ကြောင်း အောက်တိုဘာ ၈ ရက်တွင် ကြေညာခဲ့ပြီးနောက် အမေရိကန်နှင့် ယူကရိန်းအကြား ဆက်ဆံရေး ပိုမို အေးစက်င်းမာလာခဲ့သည်။

အဆိုပါ သဘောတူညီချက်အရ ရုရှားက ပထမအဆင့်အနေဖြင့် ဒီဇယ်ဆီ တန်ချိန် ၃၀၀,၀၀၀ ကျော်ကို ချက်ချင်း ပေးပို့မည်ဖြစ်ပြီး၊ နိုဝင်ဘာလတွင် တန်ချိန် ၅၀၀,၀၀၀ နှင့် နောက်ပိုင်းတွင် တန်ချိန် တစ်သန်းမှ သုံးသန်းအထိ အသီးသီး ဆက်လက် ပေးပို့သွားမည်ဖြစ်သည်။ အမေရိကန် ဘဏ္ဍာရေးဌာနကလည်း ရုရှား ဒီဇယ်ဆီ တင်သွင်းမှုအပေါ် ပိတ်ဆို့မှုများကို ဧပြီလ ၇ ရက်အထိ ယာယီ ကင်းလွတ်ခွင့် ပေးခဲ့သည်။ လာမည့် နိုဝင်ဘာလ ကွန်ဂရက် ကြားဖြတ်ရွေးကောက်ပွဲ မတိုင်မီ ပြည်တွင်း၌ မြင့်တက်နေသော စက်သုံးဆီဈေးနှုန်းများကို ထိန်းချုပ်ရန် သမ္မတ ထရမ့်ပ်က ရည်ရွယ် ဆောင်ရွက်ခြင်းဖြစ်သော်လည်း ယင်းလုပ်ရပ်အပေါ် ယူကရိန်း သမ္မတ ဇယ်လန်စကီးက ရုရှားအား စစ်ပွဲအတွက် ငွေကြေး ထောက်ပံ့ပေးရာ ရောက်သည်ဟု ပြင်းထန်စွာ ဝေဖန်ခဲ့သည်။

ယူကရိန်း၏ ဝေဖန်မှုအပေါ် သမ္မတ ထရမ့်ပ်က အောက်တိုဘာ ၁၀ ရက်တွင် ပြန်လည် တုံ့ပြန်ခဲ့ပြီး ဇယ်လန်စကီး၏ နေရာ၌ ရုရှားနှင့် ငြိမ်းချမ်းရေး ရယူနိုင်မည့် ခေါင်းဆောင်သစ်တစ်ဦးဖြင့် အစားထိုးရန် လူသိရှင်ကြား တောင်းဆိုခဲ့သည်။ အမေရိကန် ရီပတ်ဘလစ်ကန် လွှတ်တော်အမတ်အချို့နှင့် မဟာမိတ် ဗြိတိန်နိုင်ငံတို့ကလည်း ရုရှားအပေါ် ပိတ်ဆို့မှု လျှော့ချရေးကို ကန့်ကွက်ထားကြပြီး အဆိုပါ ဖြစ်စဉ်ကြောင့် အနောက်အုပ်စု မဟာမိတ်များအကြား သဘောထား ကွဲလွဲမှုများ ပိုမို ကြီးထွားလာလျက် ရှိသည်။