အခမဲ့အစားအစာကြောင့် လူ ၅,၀၀၀ ခန့် အစာအဆိပ်သင့်ခဲ့ပြီးနောက် သန့်ရှင်းရေးစည်းမျဉ်းများ ချိုးဖောက်သော အခမဲ့အစားအစာမီးဖိုချောင် ၂,၀၀၀ နီးပါးကို အင်ဒိုနီးရှား ရပ်ဆိုင်း
စက်တင်ဘာလ ၉ ရက်၊ ၂၀၂၆
အင်ဒိုနီးရှားနိုင်ငံ၌ ကျန်းမာရေးဝန်ကြီးဌာန၏ သန့်ရှင်းရေးနှင့် စံချိန်စံညွှန်း မှတ်ပုံတင်ရယူရန် ပျက်ကွက်ခဲ့သည့် အခမဲ့အစားအစာ မီးဖိုချောင် ၁,၉၉၉ ခု၏ လည်ပတ်ဆောင်ရွက်မှုများကို ယာယီပိတ်သိမ်းလိုက်ကြောင်း အမျိုးသားအာဟာရအေဂျင်စီ အကြီးအကဲ ဆူဒါရာနိုက စက်တင်ဘာ ၇ ရက်တွင် ပြောကြားခဲ့ပါတယ်။
အဆိုပါ မီးဖိုချောင်များသည် သန့်ရှင်းရေးဆိုင်ရာ မဖြစ်မနေ လိုအပ်သည့် လက်မှတ်များ ရယူထားခြင်း မရှိသဖြင့် ရပ်ဆိုင်းခဲ့ခြင်းဖြစ်ပြီး၊ လက်ရှိတွင် တစ်နိုင်ငံလုံး၌ အခမဲ့အစားအစာ ဖြန့်ဝေပေးနေသည့် မီးဖိုချောင် ၂၇,၀၂၂ ခု ရှိကြောင်း သိရပါတယ်။ အေဂျင်စီအနေဖြင့် ပိတ်သိမ်းထားသည့် မီးဖိုချောင်များကို ဆက်လက်စုံစမ်းစစ်ဆေးသွားမည်ဖြစ်ပြီး၊ စားသုံးသူများ ဘေးကင်းရေးအတွက် သန့်ရှင်းရေး စံနှုန်းများ လိုက်နာရေးကို လျှော့ပေါ့ပေးမည် မဟုတ်ကြောင်း အေဂျင်စီအကြီးအကဲက အသိပေးခဲ့ပါတယ်။
သမ္မတ ပရာဘိုဝို ဆူဘီယန်တို ဦးဆောင်၍ ၂၀၂၅ ခုနှစ် ဇန်နဝါရီလက စတင်ခဲ့သည့် ယင်းအခမဲ့နေ့လည်စာ အစီအစဉ်သည် အစားအသောက် သိုလှောင်မှု မမှန်ကန်ခြင်းနှင့် ပို့ဆောင်မှု နောက်ကျခြင်းတို့ကြောင့် ကြီးမားသည့် အစာအဆိပ်သင့်မှုများနှင့် ရင်ဆိုင်နေရတာ ဖြစ်ပါတယ်။ ဥပဒေပြုအမတ် ချားလ်စ် ဟိုနိုရစ်၏ အဆိုအရ စက်တင်ဘာ ၁ ရက်အထိ အခမဲ့အစားအစာ စားသုံးမိရာမှ လူပေါင်း ၅၀,၀၀၀ ခန့် အစာအဆိပ်သင့်မှု ခံစားခဲ့ရပြီး၊ ပြီးခဲ့သည့်အပတ်ကလည်း ပြည်နယ်အများအပြားရှိ ကျောင်းသားနှင့် ဆရာ/မ ၂,၀၀၀ ကျော် ဖျားနာမှု ဖြစ်ပွားခဲ့ကြောင်း သိရပါတယ်။
