ထိုင်းနိုင်ငံက ထားဝယ်ဆိပ်ကမ်းတွင် ပါဝင်ရန် မျှော်လင့်နေ

ဩဂုတ်လ ၁၇ ရက်၊ ၂၀၂၆

မြန်မာနိုင်ငံရှိ ကြန့်ကြာနေသည့် ထားဝယ်ရေနက်ဆိပ်ကမ်း စီမံကိန်းတွင် ရုရှားနိုင်ငံက ရင်းနှီးမြှုပ်နှံရန် စိတ်ဝင်စားမှု ပြသလာချိန်တွင် ထိုင်းနိုင်ငံကလည်း အဓိက ပါဝင်သူအဖြစ် ပူးပေါင်းဆောင်ရွက်ရန် ပြင်ဆင်နေကြောင်း မော်စကိုတွင် ပြုလုပ်ခဲ့သည့် (၉) ကြိမ်မြောက် ထိုင်း-ရုရှား ပူးတွဲကော်မရှင် အစည်းအဝေးအပြီး ထိုင်းနိုင်ငံခြားရေးဝန်ကြီး စီဟာဆက် ဖူအာကက်ကောင်းက ပြောကြားခဲ့သည်။ ထားဝယ်ဆိပ်ကမ်းသည် ထိုင်းနိုင်ငံ၏ လမ်ချဘန်းဆိပ်ကမ်းနှင့် ကီလိုမီတာ ၂၀၀ ခန့်သာ ဝေးကွာပြီး ကုန်းလမ်း၊ ရထားလမ်းတို့ဖြင့် ချိတ်ဆက်နိုင်သောကြောင့် ထိုင်းပို့ကုန်များအတွက် အခြားရွေးချယ်စရာ လမ်းကြောင်းတစ်ခု ဖြစ်လာမည်ဖြစ်သလို မလက္ကာရေလက်ကြားအပေါ် အမှီပြုနေရမှုကိုလည်း လျှော့ချပေးနိုင်မည် ဖြစ်ပါတယ်။

ထို့အပြင် နှစ်နိုင်ငံကြား လက်ရှိ အမေရိကန်ဒေါ်လာ ၁ ဒသမ ၇ ဘီလီယံခန့်သာရှိသည့် ကုန်သွယ်မှုကို အနာဂတ်တွင် ဒေါ်လာ ၅ ဘီလီယံအထိ တိုးမြှင့်ရန် ရည်မှန်းထားပြီး၊ စိုက်ပျိုးရေးနှင့် အသားထုတ်ကုန်များ တင်ပို့ရာတွင် ကြုံတွေ့နေရသည့် အတားအဆီးများကို ဖြေရှင်းရန် နှစ်နိုင်ငံ စက်ရုံစစ်ဆေးမှုများ ပူးပေါင်းဆောင်ရွက်သွားကြမည် ဖြစ်သည်။ ယူကရိန်းစစ်ပွဲကြောင့် ဖြစ်ပေါ်လာသည့် ပိတ်ဆို့အရေးယူမှုများကြားမှ တရားဝင် စည်းမျဉ်းများနှင့် ညီညွတ်သည့် ငွေပေးချေမှု လမ်းကြောင်းများ ဖန်တီးနိုင်ရေး နှစ်နိုင်ငံ ဗဟိုဘဏ်များ ဆွေးနွေးလျက်ရှိသလို ထိုင်းနိုင်ငံ၏ ရထားစနစ် ခေတ်မီရေးအတွက်လည်း ရုရှား၏ နည်းပညာများကို လေ့လာသွားမည်ဖြစ်ပါတယ်။

တစ်ချိန်တည်းမှာပင် လူဦးရေ သန်း ၁၈၀ ကျော် လွှမ်းခြုံနိုင်မည့် ထိုင်း-ယူရေးရှား စီးပွားရေးသမဂ္ဂ လွတ်လပ်သော ကုန်သွယ်ရေးသဘောတူညီချက် (FTA) ဆွေးနွေးမှုများ စတင်ရန်နှင့် ရင်းနှီးမြှုပ်နှံမှု အကာအကွယ်ပေးရေး သဘောတူညီချက်များကို အရှိန်မြှင့်ရန် ရုရှားနိုင်ငံခြားရေးဝန်ကြီး ဆာဂေး လက်ဗရော့ဗ်က တိုက်တွန်းခဲ့သည်။ သတင်းစကားများ ဖလှယ်မှုအနေဖြင့် မြန်မာနိုင်ငံတော်သမ္မတ ဦးမင်းအောင်လှိုင်၏ ထိုင်းနိုင်ငံခရီးစဉ်အတွင်း နယ်စပ်လုံခြုံရေးနှင့် ကျားဖြန့်တိုက်ဖျက်ရေး ဆွေးနွေးခဲ့မှုများကို ရုရှားသို့ ပြန်လည်မျှဝေခဲ့ပြီး၊ ဦးမင်းအောင်လှိုင်၏ ရုရှားခရီးစဉ် မတိုင်မီ မော်စကိုအနေဖြင့် မြန်မာနိုင်ငံ ငြိမ်းချမ်းရေးနှင့် စေ့စပ်ရေး ကြိုးပမ်းမှုများကို အပြုသဘောဆောင် တိုက်တွန်းပေးရန် ထိုင်းနိုင်ငံခြားရေးဝန်ကြီးက တောင်းဆိုခဲ့ပါတယ်။