Horror ဇာတ်လမ်းပုံစံ “ညမင်္ဂလာ” ရုပ်ရှင်ဇာတ်ကားကြီး Premiere Show ပွဲအခမ်းအနားကျင်းပခဲ့
ကြည်နူးစေရုပ်ရှင်ထုတ်လုပ်ရေးက Horror ဇာတ်လမ်းပုံစံ “ညမင်္ဂလာ” ရုပ်ရှင်ဇာတ်ကားကြီး Premiere Show ပွဲအခမ်းအနားကို ဩဂုတ်လ ၂၅ ရက် နေ့လယ် ၁ နာရီက ရန်ကုန်မြို့၊ သမ္မတအဆင့်မြင့်ရုပ်ရှင်ရုံမှာ ကျင်းပခဲ့ပါတယ်။
“ကျွန်တော့်အနေနဲ့ ဒီဇာတ်ကားကို ၂၀၂၃ ခုနှစ် ဒီဇင်ဘာမှာရိုက်ဖို့ ရည်ရွယ်ခဲ့ပေမယ့် အကြောင်းအမျိုးမျိုးကြောင့် ၂၀၂၄ ခုနှစ်ဒီဇင်ဘာမှ ရိုက်ဖြစ်သွားတာပါ။ ကိုယ်တိုင် ဇာတ်လမ်း ဇာတ်ညွှန်းအပြင် ဒါရိုက်တာဖြစ်တဲ့အတွက် ဇာတ်ညွှန်းကို ကိုယ်တိုင်စိတ်ကြိုက် တစ်နှစ်ပတ်လုံးပြင်ဆင်ခွင့်ရခဲ့ပါတယ်။ ခုပြန်ကြည့်ချိန်မှာလည်း အားရကျေနပ်မှု အများကြီးရခဲ့ပါတယ်။ ထိတ်လန့်ခြောက်ခြားမှုတွေကတော့ တခြားကားတွေနဲ့မတူဘဲ ပုံစံအသစ်လေး ဖန်တီးထားပါတယ်။ CGI မသုံးဘဲ ဇာတ်ကွက်နဲ့ပဲကြောက်စရာကောင်းအောင် ရိုက်ကူးခဲ့ပါတယ်”လို့ ဇာတ်လမ်း၊ ဇာတ်ညွှန်း ဒါရိုက်တာ ဒီဒီထက်အောင်က ပြောပါတယ်။
အဆိုပါဇာတ်ကားကို ဇာတ်လမ်း၊ ဇာတ်ညွှန်းအပြင် ဒါရိုက်တာအနေနဲ့ ဒီဒီထက်အောင်က သရုပ်ဆောင်တွေဖြစ်တဲ့ အကယ်ဒမီနေတိုး၊ ရွှေသမီး၊ ရတနာဗိုလ်၊ အကယ်ဒမီစိုးမြတ်သူဇာ၊ ယမုံမြင့်မြတ်၊ ဆင်မ၊ ဝေလု၊ မိုးခမ်းစတဲ့သူတွေနဲ့ ရိုက်ကူးပုံဖော်ထားတာဖြစ်ပါတယ်။
၁၃ နှစ်အောက် ကလေးငယ်များ မကြည့်ရလို့ သတ်မှတ်ထားတဲ့ “ညမင်္ဂလာ” ရုပ်ရှင်ဇာတ်ကားကြီးကို လာမယ့် သြဂုတ်လ ၂၉ ရက်နေ့မှာမြန်မာတစ်ပြည်လုံးက ရုပ်ရှင်ရုံတွေမှာ ရုံတင်ပြသမှာဖြစ်ပါတယ်။
“ဒီဇာတ်ကားကို ရိုက်ခဲ့ချိန်မှာ အမှတ်တရတွေကတော့အများကြီးပါပဲ။ ဒီကား ကမ်းလှမ်းချိန်မှာ ဗိုလ် အရမ်းပျော်တယ်။ အမှတ်တရတွေကတော့ ကိုယ့်ညီအစ်ကိုမောင်နှမတွေ ဇာတ်ကားကောင်းမို့ ကြိုးစားခဲ့တာမို့ မိုးလင်းတဲ့နေ့အထိ ရိုက်ခဲ့တာအမှတ်တရပါပဲ။ ကိုယ့်စီနီယာ ကိုနေတိုးရယ်၊ ရွှေရွှေနဲ့ ရိုက်ရတာအပြင် ပါဝင်သူတိုင်းမှာ လုပ်ကွက်လေးတွေ တော်တော်လေးကို ရကြပါတယ်။ ထိတ်လန့်ခြောက်ခြားတာကိုမှ မတူညီတဲ့ ရသနဲ့ ပရိသတ်ကြည့်ရမှာပါ”လို့ သရုပ်ဆောင် ရတနာဗိုလ်က ပြောပါတယ်။
