ရုရှားဗဟိုဘဏ်က မြန်မာကျပ်ငွေကို တရားဝင်ငွေကြေးစာရင်းမှာ ထည့်သွင်းပြီး ငွေလဲနှုန်းသတ်မှတ်
မြန်မာကျပ်ငွေအပါအဝင် နိုင်ငံခြားငွေကြေး ၁၂ မျိုးကို တရားဝင်ငွေကြေးစာရင်းမှာ ထည့်သွင်းပြီး ငွေလဲနှုန်းသတ်မှတ်လိုက်ကြောင်း ရုရှားဖက်ဒေရေးရှင်းဗဟိုဘဏ်က ထုတ်ပြန်လိုက်တယ်လို သိရပါတယ်။
ရုရှားဗဟိုဘဏ်ရဲ့ သြဂုတ်လ ၉ ရက်နေ့ တရားဝင်နိုင်ငံခြားငွေလဲလှယ်နှုန်းစာရင်းမှာ ဖော်ပြထားမှုအရ မြန်မာကျပ်ငွေ ၁၀၀၀ ကို ရုရှားငွေကြေး ၃၇.၉၉၀၃ ရူဘယ်နဲ့ ညီမျှတယ်လို သိရပြီး ပြီးခဲ့တဲ့ ဇူလိုင်လ ၁၀ ရက်နေ့ကစတင်ကာ လက်ခံအသုံးပြုလျက်ရှိတယ်လို ဆိုပါတယ်။
ရုရှားဖက်ဒေရေးရှင်းဗဟိုဘဏ်အနေနဲ့ ၎င်းတို့ဗဟိုဘဏ်ရဲ့ ငွေလဲလှယ်နှုန်းစာရင်းထဲ ထည့်သွင်းလိုက်တဲ့အထဲမှာ မြန်မာကျပ်ငွေအပြင် ဘင်္ဂလားဒေ့ရှ် တာကာ၊ ဘာရိန်း ဒီနာ၊ ဘိုလီးဗီးယား ဘိုလီးဗီယားနို၊ အိုမန်နီ ရီရယ်၊ ကျူးဘား ပီဆို၊ အယ်လ်ဂျီးရီးယား ဒီနာ၊ အီရန် ရီယယ်၊ အီသီယိုးပီးယား ဘီယာ၊ မွန်ဂိုးလီးယား ထူးဂရခ်၊ နိုင်ဂျီးရီးယား နိုင်ရာ နဲ့ ဆော်ဒီရီယယ်တိုလည်း ပါဝင်လာတယ်လို့ သိရပါတယ်။
