နေပြည်တော် ပြည်သူ့ဆေးရုံကြီး(ခုတင် -၃၀၀)ကို နစက ဥက္ကဋ္ဌ ကြည့်ရှုစစ်ဆေး
မန္တလေးငလျင်ကြီးဒဏ်ကြောင့် ပျက်စီးမှုများဖြစ်ပေါ်ခဲ့သည့် နေပြည်တော်ပြည်သူ့ဆေးရုံကြီး(ခုတင် -၃၀၀)ရှိ ဆေးကုသဆောင်များနှင့် ဝန်ထမ်းအိမ်ရာများကို နစကဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ဧပြီ ၈ ရက်ညနေပိုင်းက ကြည့်ရှုစစ်ဆေးခဲ့သည်။
ထိုသို့ ကြည့်ရှုစစ်ဆေးပြီးနောက် ထိခိုက်ပျက်စီးခဲ့မှုများအား ဆောက်လုပ်ရေးပညာရှင်များဖြင့် စနစ်တကျစစ်ဆေး၍ ပြုပြင်၍ရနိုင်သည့်အဆောက်အဦများကို ပြန်လည်ပြုပြင်ခြင်း၊ ပြုပြင်၍မရနိုင်သည့် အန္တရာယ်ရှိအဆောက်အဦများကို ဖြိုချဖျက်ဆီး၍ အသစ်ပြန်လည်တည်ဆောက်ခြင်းတို့ကို ဆောင်ရွက်ရမည်ဟု မှာကြားသည်။
အဆိုပါ နေပြည်တော်ပြည်သူ့ဆေးရုံကြီး(ခုတင်- ၃၀၀)ရှိ ဆေးကုသဆောင်များ၌ မန္တလေးငလျင်ကြီးဒဏ်ကြောင့် အဆောက်အဦများထိခိုက်ပျက်စီးမှုများပြားခဲ့၍ ဆေးရုံကို ဇေယျာသီရိမြို့နယ် ခုတင်(၅၀)ဆံ့ပြည်သူ့ဆေးရုံသို့ ယာယီပြောင်းရွှေ့ဖွင့်လှစ်ပြီး ဆေးကုသမှုများကို ဆက်လက်ဆောင်ရွက်ပေးလျက်ရှိသည်။
